Pedagogia da teater è per Bagat l'intermediaziun tranter teater e public. Oravant tut als uffants vul Bagat pussibilitar in'approfundaziun en il teater ed ina egliada davos las culissas. Las scolas èn in ferm partenari da Bagat, pertge tras quellas pon tut ils uffants far diever da l'offerta artistica e culturala. Per Bagat è l'intermediaziun, l'avischinaziun e l'elavuraziun en il medium teater part da siu principi da lavur.
Suenter la preschentaziun dal toc han las scolaras ed ils scolars la pussaivladad dad inscuntrar ils dus acturs. Ils acturs lavuran cun ils uffants, mussan als uffants gieus da teater e co els sa preparan per las preschentaziuns. Ils uffants pon era crititgar, dir tge che ha plaschì e tge betg. Els pon far dumondas davart l'istorgia e davart la lavur da teater en general. Uschia survegn il public invista en l'inscenaziun e po metter l'eveniment da teater en novs connexs.
Per la magistraglia metta Bagat a disposiziun ina pitschna rimnada cun ideas per gieus ed impuls per ina discussiun davart il toc da teater.